ကျောက်ဆည်မြို့နယ် ဇော်ဂျီမြစ်အတွင်း အမျိုးသား ၁ ဦး ရေနစ်သေဆုံး
PUBLISHED - August 30, 2023
နေပြည်တော်၊ သြဂုတ် ၃၀
မန္တလေးတိုင်းဒေသကြီး၊ ကျောက်ဆည်မြို့နယ်၊ ဇော်ဂျီမြစ်အတွင်း သြဂုတ်လ ၂၉ ရက်နေ့၊ မွန်းလွဲ ၁ နာရီ ၀၇ အချိန်က လူ (၁) ဦး ရေနစ်မှုဖြစ်ပွား၍ သေဆုံးခဲ့ကြောင်း မီးသတ်တပ်ဖွဲ့မှ သိရသည်။
ကျောက်ဆည်မြို့နယ်၊ ဇော်ဂျီမြစ်အတွင်း လူ ၁ ဦး ရေနစ်နေကြောင်း 191 Report Mobile Application အား အသုံးပြု၍ ပြည်သူတစ်ဦးမှ သတင်းပေးပို့လာသဖြင့် ကျောက်ဆည်မြို့နယ်မီးသတ်စခန်းမှ ရှာဖွေကယ်ဆယ် ရေးတပ်ဖွဲ့ဝင်များနှင့် အရန်မီးသတ်တပ်ဖွဲ့ဝင်များမှ သွားရောက်ကူညီဆောင်ရွက်ခဲ့ကြောင်း သိရသည်။
မွန်းလွဲ ၁ နာရီ ၂၅ မိနစ်အချိန်တွင် ရေနစ်သေဆုံးသူ အမျိုးသား (၁) ဦးအား ရှာဖွေတွေ့ရှိခဲ့ပြီး Myanmar Rescue အသင်းမှ ယာဉ်ဖြင့် ကျောက်ဆည်မြို့နယ်ပြည်သူ့ဆေးရုံသို့ ပို့ဆောင်ပေးခဲ့ကြောင်း သိရသည်။
#PeopleMedia