ကျောက်ဆည်မြို့ မြို့မဈေးအပြင်ဘက်ရှိ ရွှေဆိုင်နှစ်ဆိုင်ကို PDF (၅) ယောက်က ဓားပြဝင်တိုက်
PUBLISHED - January 12, 2024
နေပြည်တော်၊ ဇန်နဝါရီ ၁၂
မန္တလေးတိုင်းဒေသကြီး၊ ကျောက်ဆည်မြို့၊ စုကြီးရပ်ကွက်ရှိ၊ မြို့မဈေးအပြင်ဘက် အရှေ့ဘက်တန်းရှိ ဦးသန်းထွန်းနှင့် ဦးသန်းနိုင်တို့ ပိုင်ဆိုင်သည့် ရွှေဆိုင် နှစ်ဆိုင်ကို PDF အဖွဲ့ဝင် (၅) ဦးမှ ဓားပြဝင်တိုက်သွား ကြောင်း သိရသည်။
ဇန်နဝါရီလ (၁၁) ရက် နေ့လယ် (၁၁) နာရီ (၅၅) မိနစ်အချိန်က အဆိုပါ ရွှေဆိုင်နှစ်ဆိုင်ကို လက်နက်များ ကိုင်ဆောင်ထားသည့် PDF အဖွဲ့ဝင် (၅) ဦးမှ သေနတ်များ ပစ်ဖောက်ကာ ဝင်ရောက်လာကြောင်း သိရသည်။
ယင်းနောက်တွင် သေနတ်ဒင်၊ တူများဖြင့် မှန်ကောင်တာများကို ရိုက်ခွဲပြီး ဦးသန်းထွန်း+ဒေါ်ခင်မာရီ ရွှေပန်း တိမ်ဆိုင်မှ ရွှေထည်ပစွည်း ၃၀ ကျပ်သားနှင့် ဦးသန်းနိုင်+မသူဇာဝင်း ရွှေပန်းတိမ်ဆိုင်မှ ရွှေထည်ပစွည်း ၄၀ ကျပ်သား စုစုပေါင်း ရွှေထည်ပစွည်း ၇၀ ကျပ်သား၊ သိန်းနှစ်ထောင်ကျော်ဖိုး လုယက်ယူဆောင်ကာ ကျောက် ဆည်-တံတားဦးကားလမ်းအတိုင်း ထွက်ပြေးသွားကြောင်း သိရသည်။
#PeopleMedia