တာမွေမြို့နယ်တွင် ကျပ်သိန်း ၁၄၀၀ ကျော်တန်ဖိုးရှိ စိတ်ကြွရူးသွပ်ဆေးပြားနှင့် Happy Water မူးယစ်ဆေးဝါး များ ဖမ်းဆီးရမိ
PUBLISHED - March 1, 2024
နေပြည်တော်၊ မေ ၁
ရန်ကုန်တိုင်းဒေသကြီး၊ တာမွေမြို့နယ်တွင် ငွေကျပ်သိန်း ၁၄၀၀ ကျော်တန်ဖိုးရှိ စိတ်ကြွရူးသွပ်ဆေးပြားနှင့် Happy Water မူးယစ်ဆေးဝါးများ ဖမ်းဆီးရမိခဲ့ကြောင်း မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့မှ သိရ သည်။
ဖေဖော်ဝါရီလ ၂၇ ရက်နေ့ ညနေ ၄ နာရီ ၃၀ အချိန် တပ်ဖွဲ့ဝင်များပါဝင်သော ပူးပေါင်းအဖွဲ့သည် သတင်းအရ သက်သေများနှင့်အတူ တာမွေမြို့နယ်၊ တာမွေလေးရပ်ကွက်၊ လေးဒေါင့်ကန်လမ်းတွင် ငြိမ်းချမ်း မောင်းနှင်ပြီး ဇော်လှိုင်ဦး(ခ)အာကာနှင့် နေဇော်ဦးတို့လိုက်ပါလာသည့် MITSUBISHI အမျိုးအစား မော်တော်ယာဉ်အား ရပ်တန့်စစ်ဆေးရှာဖွေရာ ယာဉ်ပေါ်တွင် သိုဝှက်သယ်ဆောင်လာသော စိတ်ကြွရူးသွပ်ဆေးပြား ၇၈၀၀၀ ပြား(ဒေသကာလပေါက်ဈေးတန်ဖိုးငွေကျပ်သိန်း ၇၈၀)နှင့် လက်ကိုင်ဖုန်း ၃ လုံးတို့အား တွေ့ရှိသိမ်းဆည်း ရမိခဲ့ကြောင်း သိရသည်။
ကွင်းဆက်ဖော်ထုတ်ချက်အရ ညနေ ၅ နာရီ ၂၀ အချိန် အဆိုပါ စိတ်ကြွရူးသွပ်ဆေးပြားများရောင်းချသူ ကျော်နိုင်အား ရန်ကင်းမြို့နယ်၊ ကျောက်ကုန်းမီးပွိုင့်အနီးတွင် လက်ကိုင်ဖုန်း ၁ လုံးနှင့် လည်းကောင်း၊ ည ၆ နာရီ ၃၀ အချိန် ကျော်နိုင် နေထိုင်သည့် တာမွေမြို့နယ်၊ မန်အောင်ရပ်ကွက်ရှိ နေအိမ်အတွင်းမှ စိတ်ပြောင်း ဆေးဝါး Happy Water အလေးချိန် ၂.၂၅ ကီလို(ဒေသကာလပေါက်ဈေးတန်ဖိုးငွေကျပ် ၆၇၅ သိန်း)နှင့် လည်းကောင်း၊ ည ၇ နာရီ ၁၀ အချိန် ကျော်မြင့်ဦးအား ဗဟန်းမြို့နယ်၊ နတ်မောက်ရပ်ကွက်၊ ဖိုးစိန်လမ်းတွင် လက်ကိုင်ဖုန်း ၁ လုံးနှင့်လည်းကောင်း ထပ်မံဖမ်းဆီးရမိခဲ့သဖြင့် ငြိမ်းချမ်း (၃၈)နှစ်၊ ဇော်လှိုင်ဦး (ခ)အာကာ (၃၅)နှစ်၊ နေဇော်ဦး (၃၆)နှစ်၊ ကျော်နိုင် (၃၇)နှစ်နှင့် ကျော်မြင့်ဦး (၄၆)နှစ်တို့အား တာမွေမြို့မရဲစခန်းတွင် မူးယစ်ဆေးဝါးနှင့် စိတ်ကိုပြောင်းလဲစေသောဆေးဝါးများဆိုင်ရာဥပဒေအရ အမှုများရေးဖွင့် အရေးယူထားရှိပြီး ကွင်းဆက်များ ဖော်ထုတ်လျက်ရှိကြောင်း သိရသည်။
#PeopleMedia