ပြည်ပမှ မြန်မာနိုင်ငံသို့ငွေကြေးကို ဟွန်ဒီဖြင့် ပေးပို့ခြင်းနှင့် ပြည်တွင်းတွင် ငွေကြေးကို ဟွန်ဒီဖြင့် ထုတ်ပေး နေသူ ၂၀ ဦးအား အရေးယူ

PUBLISHED - January 13, 2024

နေပြည်တော်၊ ဇန်နဝါရီ ၁၃

 

ပြည်ပမှ မြန်မာနိုင်ငံသို့ငွေကြေးကို ဟွန်ဒီဖြင့် ပေးပို့ခြင်းနှင့် ပြည်တွင်းတွင် ငွေကြေးကို ဟွန်ဒီဖြင့် ထုတ်ပေးနေ သူ ၂၀ ဦးအား အရေးယူဆောင်ရွက်လျက်ရှိကြောင်း မြန်မာနိုင်ငံတော်ဗဟိုဘဏ်က ထုတ်ပြန်ထားသည်။

 

မြန်မာနိုင်ငံတော်ဗဟိုဘဏ်အနေဖြင့် ဟွန်ဒီလုပ်ငန်းဆောင်ရွက်နေမှုများနှင့်ပတ်သက်၍ အထွေထွေအုပ်ချုပ် ရေး ဦးစီးဌာန၊ အထူးစုံစမ်း စစ်ဆေးရေးဦးစီးဌာနနှင့် ငွေကြေးဆိုင်ရာ စုံစမ်းထောက်လှမ်းရေးအဖွဲ့တို့နှင့် ပူး ပေါင်းဆောင်ရွက်ပြီး တရားမဝင် ဟွန်ဒီလုပ်ငန်း လုပ်ကိုင်သူများအား ဖော်ထုတ်ခြင်း၊ တရားဝင် ပြည်ပငွေလွှဲ လုပ်ငန်းလိုင်စင်လျှောက်ထားရန် လိုအပ်သည်များ အသိပေးခြင်းတို့ကို ဆောင်ရွက်လျက်ရှိကြောင်း ထုတ်ပြန် ချက်တွင် ပါဝင်သည်။

 

မြန်မာနိုင်ငံတော် ဗဟိုဘဏ်အနေဖြင့် တရားမဝင် ဟွန်ဒီလုပ်ငန်း ဆောင်ရွက်နေမှုများကို သက်ဆိုင်ရာ ဥပဒေများနှင့်အညီ တရားစွဲဆို အရေးယူဆောင်ရွက်လျက်ရှိပြီး သံသယဖြစ်ဖွယ် ငွေလွှဲ/ငွေလဲလှယ်သည့် လုပ်ငန်းလုပ်ကိုင်သူ ၉၉ ဦးနှင့် ပတ်သက်၍ စိစစ်ဆောင်ရွက်ခဲ့ရာ မြန်မာနိုင်ငံရဲတပ်ဖွဲ့က လူပုဂ္ဂိုလ်၂၀ ဦးကို အမှုဖွင့် အရေးယူ ထားပြီးဖြစ်သကဲ့သို့ တရားမဝင် ငွေလွှဲ/ ငွေလဲလှယ်သည့်လုပ်ငန်းလုပ်ကိုင်သူ ၂၀ ဦးအား သက်ဆိုင်ရာဥပဒေများနှင့်အညီ သက်ဆိုင်ရာ မြို့နယ်တရားရုံးများသို့ တရားစွဲဆိုတင်ပို့ထားပြီး ဆက်လက် အရေးယူ ဆောင်ရွက်လျက်ရှိကြောင်း သိရသည်။

 

ယင်းနောက်တွင် သက်ဆိုင်ရာမြို့နယ်တရားရုံးများ၌ အမှုဖွင့်အရေးယူ ထားခြင်းခံရသူများတွင် တရားဝင် လုပ်ငန်း လိုင်စင်ရယူထားခြင်းမရှိဘဲ ထိုင်းနိုင်ငံ၊ တရုတ်နိုင်ငံနှင့် မလေးရှားနိုင်ငံများရှိ မြန်မာအလုပ်သမား လစာငွေများအား တရားမဝင် လွှဲပြောင်းထုတ်ပေးသူ ကိုးဦး၊ ကုန်ပစ္စည်း ဝယ်ယူခြင်းများအတွက် တရားမဝင် ငွေလွှဲပြောင်းပေးချေပေးသူ သုံးဦးနှင့် နိုင်ငံခြားငွေမှ မြန်မာကျပ်ငွေသို့ လဲလှယ်ပြီး ပြည်တွင်း၌ ငွေလွှဲပြောင်း ထုတ်ပေးသူ ရှစ်ဦးတို့ပါဝင်ပြီး ယင်းတို့အား သက်ဆိုင်ရာ ဥပဒေပြဋ္ဌာန်းချက်များနှင့်အညီ ထောင်ဒဏ်နှင့် ငွေဒဏ်များ အမိန့်ချမှတ် အရေးယူဆောင်ရွက်လျက်ရှိကြောင်း သိရသည်။

 

#PeopleMedia