ဘန်ကောက်မှာဖမ်းမိတဲ့အထဲက သူတောင်းစား ၁၂ ယောက်ထဲမှာ ငွေသားဘတ် ၃ သိန်းနဲ့ ဘဏ်အကောင့် ဘတ် ၁ သန်းရှိတဲ့ ထိုင်းအမျိုးသမီးတစ်ယောက်တွေ့ရှိ
PUBLISHED - December 14, 2024
နိုင်ငံတကာ၊ ဒီဇင်ဘာ ၁၄
ထိုင်းနိုင်ငံမှာ ဘန်ကောက်မြို့မှာ သူတောင်းစားရှင်းလင်းရေးအတွက် ရဲတပ်ဖွဲ့က စစ်ဆင်ရေးတစ်ရပ် ဆောင်ရွက်ခဲ့ရာမှာ ဖမ်းမိတဲ့ သူတောင်းစားတွေထဲက အမျိုးသမီးတစ်ယောက်ထံမှာ ဘတ်ငွေ ၃၀၀,၀၀၀ တွေ့ရှိရပြီး အဆိုပါအမျိုးသမီးရဲ့ဘဏ်အကောင့်ထဲမှာ ဘတ်ငွေတစ်သန်းအထိ ထည့််သွင်းထားတာကို တွေ့ရှိရကြောင်း ဘန်ကောက်ပို့စ်မှာ ရေးသားဖော်ပြထားပါတယ်။
ဘန်ကောက်မြို့တော် သူတောင်းစားနှိမ်နှင်းရေးအတွက် ဒီဇင်ဘာ ၁၂ ရက်နေ့ (ကြာသပတေးနေ့) ရဲတပ်ဖွဲ့က စစ်ဆင်ရေးတစ် ရပ်ဆောင်ရွက်ခဲ့ရာ ထိုင်းနိုင်ငံသားနဲ့ နိုင်ငံခြားသား သူတောင်းစား ၁၂ ယောက် ဖမ်းဆီးမိခဲ့ပါတယ်။
ကြာသပတေးညပိုင်းက ဘန်ကောက်မြို့ နန်နာနယ်မြေကိုသွားတဲ့လမ်းက ဆူခုန်ဗစ်လမ်းနဲ့ အဆော့လမ်းကြား က လမ်းဆုံနေရာ စီးပွာရေးနယ်မြေကို လူဝင်မှုကြီးကြပ်ရေးအရာရှိတွေ၊ လမ်ပီနီရဲတပ်ဖွဲ့ဝင်တွေနဲ့ လုံခြုံရေးနဲ့ လူမှုဖူလုံရေးအရာရှိတွေပါဝင်တဲ့အဖွဲ့ က ဝင်ရောက်စစ်ဆေးခဲ့တာဖြစ်ပါတယ်။
အဆိုပါနယ်မြေလမ်းကြောင်းတစ်လျှောက်တစ်လျှောက်မှာ သူတောင်းစားတွေ ပြည့်နှက်နေပြီး နိုင်ငံရဲ့ ကမ္ဘာလှည့်ခရီးသွား လုပ်ငန်းပုံရိပ်ကို ထိခိုက်စေကြောင်း တိုင်ကြားလာတဲ့အတွက် ထိုင်းအာဏာပိုင်တွေက အခုလို ဝင်ရောက်စစ်ဆေးခဲ့တာဖြစ်ပါတယ်။
အဆိုပါစစ်ဆင်ရေးကို အမှတ် ၁ လူဝင်မှုကြီးကြပ်ရေးဌာန ဒုတိယအကြီးအကဲ ဒုတိယရဲမှူးကြီး ဆူရီယာပန်းဆွမ်ဘတ်နဲ့ ဘန်ကောက် အိမ်ရာမဲ့များကာကွယ်ရေးစင်တာရဲ့ ညွှန်ကြားရေးမှူး ထာပနီး ဆီရိဆွမ်ဘွန်းတို့ ဦးဆောင်ခဲ့တာဖြစ်ပါတယ်။
စစ်ဆင်ရေးဆောင်ရွက်စဉ်အတွင်း ထိုင်းနိုင်ငံသား ၈ ဦး၊ ကမ္ဘောဒီးယားနိုင်ငံသား ၂ ဦး၊ လာအိုနိုင်ငံသား ၁ ဦးနဲ့ မြန်မာနိုင်ငံသား ၁ ဦးတို့ကို ဖမ်းဆီးခဲ့ပါတယ်။ ဖမ်းမိတဲ့အထဲက နိုင်ငံခြားသား ၄ ဦးဟာ နိုင်ငံတွင်း တရားမဝင် ဝင်ရောက်လာမှုနဲ့လည်း စွဲချက်တင်ခံထားရကြောင်း ဖမ်းဆီးရေး အဖွဲ့က ပြောပါတယ်။
ဖမ်းမိတဲ့အထဲက ထိုင်းနိုင်ငံသားအမျိုးသမီးထံမှာ ဘတ်ငွေ ၃၀၀၀၀၀ တွေ့ရှိခဲ့သလို ၎င်းရဲ့ဘဏ်အကောင့်ထဲ မှာလည်း ဘတ်ငွေ တစ်သန်းဝန်းကျင်ရှိနေတာကို တွေ့ရှိခဲ့ရပါတယ်။
အဆိုပါ ငွေကြေးတွေကို တောင်းရမ်းပြီး စုဆောင်းခဲ့တာဖြစ်ကြောင်း အဲဒီအမျိုးသမီးက အာဏာပိုင်တွေကို ပြောပါတယ်။ ဖမ်းဆီးမိသူအားလုံးကို လမ်ပီနီရဲစခန်းကို လွှဲပြောင်းပေးခဲ့တယ်လို့ သိရပါတယ်။
Ref: 12 beggars arrested in Bangkok,1 with B300,000 cash, B1m in bank account
#PeopleMedia