မိတ္ထီလာမြို့တွင် လူ ၄ ဦး၏ ခရီးဆောင်အိတ်များအတွင်းမှ ဘိန်းဆီခဲနှင့် ဘိန်းစိမ်းများဖမ်းဆီးရမိ
PUBLISHED - September 7, 2023
နေပြည်တော်၊ စက်တင်ဘာ ၇
မန္တလေးတိုင်းဒေသကြီး၊ မိတ္ထီလာမြို့၊ အောင်ဇေယျာရပ်ကွက်ရှိ ကားဂိတ်တွင် လူ ၄ ဦး၏ ခရီးဆောင်အိတ်များ အတွင်းမှ ဘိန်းဆီခဲနှင့် ဘိန်းစိမ်းများ ဖမ်းဆီးရမိခဲ့ကြောင်း မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့မှ သိရ သည်။
တပ်ဖွဲ့ဝင်များပါဝင်သော ပူးပေါင်းအဖွဲ့သည် စက်တင်ဘာလ ၃ ရက်နေ့ နေ့လည် ၁၂ နာရီခွဲအချိန် သတင်း အရ မိတ္ထီလာမြို့၊ အောင်ဇေယျာရပ်ကွက်ရှိ ကားဂိတ်တွင် မသန်းသန်းဌေး၊ မမာရွှေ၊ သီဟနှင့် ချစ်မင်းသူ တို့အား စစ်ဆေးရှာဖွေရာ ၎င်းတို့၏ ခရီးဆောင်အိတ်များအတွင်းမှ ဘိန်းဆီခဲ ၃၀ ကီလို၊ ဘိန်းစိမ်း ၁၆ ကီလို သိမ်းဆည်းရမိခဲ့ပြီး ကွင်းဆက်အရ ၁၃း၀၀ အချိန် မိတ္ထီလာမြို့၊ ပေါက်ချောင်း(တိုးချဲ့)ရပ်ကွက်၊ နယ်မြေ(၁၃)ရှိ နေအိမ်တွင် မူးယစ်ဆေးဝါးများ သယ်ဆောင်ခိုင်းသူ မသန်းသန်းအေးအား ဆက်လက်ဖမ်းဆီးရမိခဲ့သဖြင့် မသန်းသန်းဌေး (၅၅) နှစ်၊ မမာရွှေ (၄၇) နှစ်၊ သီဟ (၃၃) နှစ်၊ ချစ်မင်းသူ (၃၃) နှစ်နှင့် မသန်းသန်းအေး (၅၈) နှစ်တို့အား မူးယစ်ဆေးဝါးနှင့် စိတ်ကိုပြောင်းလဲစေသော ဆေးဝါးများဆိုင်ရာ ဥပဒေအရ အရေးယူထားကြောင်း သိရသည်။
#PeopleMedia