မြင်းခြံမြို့နယ်တွင် ရဲတပ်ဖွဲ့ဝင်များ စီးနင်းလာသည့်ကားကို PDF အဖွဲ့ဝင်များမှ ပစ်ခတ်မှုကြောင့် ရဲတပ်ဖွဲ့ဝင် (၆) ဦး ကျဆုံး

PUBLISHED - March 13, 2024

နေပြည်တော်၊ မတ် ၁၃

 

မန္တလေးတိုင်းဒေသကြီး၊ မြင်းခြံမြို့နယ်တွင် ရဲတပ်ဖွဲ့ဝင်များ စီးနင်းလိုက်ပါလာသည့် ကားကို PDF အဖွဲ့ဝင် များမှ ပစ်ခတ်မှုကြောင့် ရဲတပ်ဖွဲ့ဝင် (၆)ဦး ကျဆုံးသွားကြောင်း သိရသည်။

 

မတ်လ (၁၁)ရက် နံနက် (၁၁)နာရီခန့်က မြင်းခြံ- မြို့သာလမ်း၊ တူရွင်းဘို့ကျေးရွာနှင့် သစ်ရုံကျေးရွာ အကြား တွင် ရဲတပ်ဖွဲ့ဝင်များ စီးနင်းလိုက်ပါလာသည့် (Kluger) ကလူဂါ အမျိုးအစား ကားကို PDF အဖွဲ့ဝင်များမှ စောင့်ကြိုပစ်ခတ်ခဲ့သည်။

 

ယင်းသို့ ပစ်ခတ်မှုကြောင့် ကားပေါ်တွင် လိုက်ပါလာသည့် ရဲတပ်ဖွဲ့ဝင် (၆)ဦး ကျဆုံးသွားကြောင်းနှင့် ရဲတပ်ဖွဲ့ ဝင်များ ကိုင်ဆောင်ထားသည့် MA 1 (၁)လက်၊ MA 2 (၁)လက်၊ MA 3 (၁)လက်၊ G3 (၂)လက်၊ Type 81 (၁)လက် ၊ MA 5(ပစ္စတို) (၁)လက် ၊ ၅.၅၆ မမ ကျည် (၉၆)တောင့် ၊ ၇.၆၂ ကျည် (၂၁၉)တောင့်၊ ကျည် ဘောက် (၁၃)ခု၊ ဖုန်း (၄)လုံး ၊ ပါဝါဘန့်ခ် (၁)လုံး၊ စကားပြောစက် (၁)လုံးနှင့် ငွေကျပ် (၅)ထောင် တို့ကို PDF အဖွဲ့ဝင်များမှ သိမ်းဆည်းရရှိသွားကြောင်း သိရသည်။

 

ယင်းတိုက်ခိုက်မှုကို PDF အဖွဲ့များဖြစ်သည့် အနောက် မြောက်စစ်ဒေသ၊ PLA ရဲခေါင်ပြောက်ကျားတပ်ဖွဲ့၊ ဗမာ့ လွတ်မြောက်ရေးတပ်ဖွဲ့၊ လွတ်လပ်ရေးတပ်တော်၊ ပခုက္ကူမြို့ပြပြောက်ကျားတပ်ဖွဲ့ ၊ မြင်းခြံ 35 တပ်ဖွဲ့နှင့် BGF အဖွဲ့တို့က လုပ်ဆောင်ခဲ့ကြခြင်းဖြစ်ကြောင်း ၎င်းအဖွဲ့များက ထုတ်ပြန်ထားသည်။

 

ပြီးခဲ့သည့် ဇန်နဝါရီလ (၂၂) ရက်ကလည်း မြင်းခြံ- ဆီမီးခုံ လမ်းပိုင်းတွင် မန္တလေးမှ ပြန်လာသည့် ရဲတပ်ဖွဲ့ ဝင်များကို PDF အဖွဲ့ဝင်များက စောင့်ကြိုပစ်ခတ်ခဲ့သဖြင့် ရဲမေများအပါအဝင် ရဲတပ်ဖွဲ့ဝင် (၆) ဦး ကျဆုံးခဲ့ သည်။

 

#PeopleMedia