မြန်မာနိုင်ငံဆိုင်ရာ ဥပဒေမူကြမ်း ၂ ရပ် အမေရိကန် အောက်လွှတ်တော်အတည်ပြု
PUBLISHED - September 26, 2019
တပ်မတော်ကာကွယ်ရေး ဦးစီးချုပ် ဗိုလ်ချုပ်မှူးကြီးမင်းအောင်လှိုင်အပါအ၀င်၊ လူ့အခွင့်အရေးချိုး ဖောက်မှုတွေမှာ တာဝန်ရှိသူတွေ၊ သူတို့ကို စုံစမ်းစစ်ဆေးအရေးယူဖို့ ပျက်ကွက်သူတွေပါ အရေးယူဒဏ်ခတ်မယ့် BURMA Act ၂၀၁၉ (Burma Unified through Rigorous Military Accountability Act) ကို စက်တင်ဘာလ (၂၄) ရက်နေ့က အမေရိကန်အောက်လွှတ်တော်မှာ မဲခွဲ ဆုံးဖြတ်ရာမှာ ထောက်ခံမဲ ၃၉၄ မဲ၊ ကန့်ကွက်မဲ ၂၁ မဲနဲ့ အတည်ပြုခဲ့ပါတယ်။ အဲဒီလို မဲခွဲဆုံးဖြတ် ရာမှာ (NV=not voting) မဲမပေးတဲ့ အမတ်ပေါင်း ၁၈ ဦးရှိခဲ့ပါတယ်။
BURMA Act ၂၀၁၉ ဥပဒေမူကြမ်း ကို အောက်လွှတ်တော် နိုင်ငံခြားဆက်ဆံရေးကော်မတီ လက်ရှိ ဥက္ကဋ္ဌ ဒီမိုကရက် လွှတ်တော်အမတ် Eliot Engel နဲ့ အောက်လွှတ်တော် နိုင်ငံခြား ဆက်ဆံရေး ကော်မတီ အာရှနဲ့ ပစိဖိတ်ရေးရာ ဌာနခွဲ ဥက္ကဋ္ဌဟောင်း ရီပါပလင်ကန်အမတ် Steve Chabot တို့က ဦးဆောင်တင်သွင်း ခဲ့တာဖြစ်ပါတယ်။ မြန်မာစစ်တပ်နဲ့ အမေရိကန် စစ်တပ် ကြား စစ်ရေးအရ ပူးပေါင်းဆောင်ရွက်မှု ကန့်သတ်တားမြစ်ချက်အပါအ၀င် မြန်မာနိုင်ငံက ပဋိပက္ခဖြစ်နေတဲ့ ဒေသတွေနဲ့ အိမ်နီးချင်း ဘင်္ဂလားဒေ့ရ်ှမှာ ခိုလှုံနေတဲ့ ဒုက္ခသည်တွေ အတွက် လူသားချင်းစာနာမှု အကူအညီပေးဖို့ အမေရိကန်ဒေါ်လာ ၂၂၁ သန်း ပါဝင်တဲ့ ဘတ်ဂျက် လျာထားချက်၊ မြန်မာနိုင်ငံတွင်း လူ့အခွင့်အရေး ချိူးဖောက်မှုတွေမှာ တာဝန်ရှိသူတွေနဲ့ အဖွဲ့အစည်းတွေကို ဒဏ်ခတ်အရေးယူဖို့ စတဲ့ အချက်တွေ ပါဝင်ပါတယ်။
ဒီဥပဒေမူကြမ်းမှာတော့ နိုင်ငံရေးအကျဉ်းသားတွေ လွတ်မြောက်ရေးအပါအ၀င် နိုင်ငံရေး အကျဉ်းသားဟောင်းတွေ ကူညီစောင့်ရှောက် ရေးနဲ့ နိုင်ငံရေး အကျဉ်းသားတွေ လွတ်မြောက်ရေးအတွက် ဆောင်ရွက်နေတဲ့ အရပ်ဖက် အဖွဲ့အစည်းတွေကို အမေရိကန်နိုင်ငံခြားရေးဌာနအနေနဲ့ ကူညီပံပိုးဖို့ စတဲ့အချက်တွေ ပြဌာန်းထားပါတယ်။
အခု ဥပဒေမူကြမ်း နှစ်ခုလုံးဟာ ဇူလိုင်လက အောက်လွှတ်တော်မှာ အတည်ပြုခဲ့တဲ့ NDAA အမျိုးသားကာကွယ်ရေး ခွင့်ပြုမိန့် ဥပဒေမူကြမ်းမှာ ပြင်ဆင်ချက်အနေနဲ့ ပါဝင်ထားပြီးသားဖြစ်ပါတယ်။ ဒီပြင်ဆင်ချက် ဥပဒေမူကြမ်းနှစ်ခုကို အင်္ဂါနေ့က အောက်လွှတ်တော်မှာ ထပ်မံမဲခွဲ ဆုံးဖြတ်ရတဲ့ အကြောင်းအရင်းကတော့ မြန်မာ့အရေး သီးခြားဥပဒေတွေ အဖြစ် ပြဌာန်းနိုင်ဖို့ အောက်လွှတ်တော်ရဲ့ ကြိုးပမ်းချက် ဖြစ်ပါတယ်။
Ref; https://burmese.voanews.com